Tudan Kiulu, 29.7.2013:- Notunui no di tiimanimanon momoguno ginaras lotirik mantad SESB kumaa mogigion id Kg. Tudan Kiulu Tuaran. Nakalaid pagandadan pongoputan ginaras lotirik nasabab no di amu nokorikot iri meter lotirik sundung pia do haro noh tolu walai noputan ginaras lotirik pogulu dilo. Tolu walai dilo osikap nakaanu meter om ginaras lotirik sabab minokiwairing di suai o kuntiriktor wairing.
Ontok tadau diti, kogumuan walai i minokiwairing kuntiriktor di suai kagu nakaanu nodi do ginaras lotirik. Sosomok sontoun om kaanu nogi walai dilo meter ginaras lotirik. Mininsondiri om minoi turubung di SESB Karamunsing Kota Kinabalu monguhot kokomoi koligaganan nakasabab alaid kaanu do meter dilo. Tumanud diolo, laid no daa do nokotounda iri meter hilo id koupisan SESB. Om amu alaid ogulu diti, minonolipaun no di SESB kumaa ngai di sanganu walai do mooi pambarai diposit do meter. Nounsub o kopongoputan meter ginaras lotirik kalapas nabarayan iri diposit ginaras lotirik.
Baino, okito nodi binabang lampung mantad kawalaian ngai hiti id kaalaian. Lobi osonong nodi kapaapanahon karaja loolobi id suang walai toi posorili walai. Kaanu nodi ngai tulun kampung i momuumutanom do mongimbasi, momodoropi toi momongkos ngai tongo losun sundung do aralom no tuong tuu haro nodi lampung mantad ginaras lotirik SESB. Kiharo nodi ngai kanto tongo aisbuk om osogit sogit nodi kopio ri tiinumon id suang tiin po toi butul. Milo nodi ngai do momoli tongo tahata sada po toi montok kogunoon sominggu toi lobi laid tuu alaid nodi rumaag sabab poinsuang aisbuk. Haro nodi ngai tulun kampung hiti do mongindapu om papadagang do tongo sokirim om tiinumon tosogit. Ogumu kopio kinoimogoton gisom do nakaharo iti ginaras lotirik.
Toririmo do rayat do mongounsikou ngai kouhupan natahak om tahakon do porinta. Id kopotutan daa do kouhupan miagal ngai diti porikoton kumaa rayat kaamapi no rayat id suok toi osodu kopio mantad kakadaian.
KOUNSIKAHAN OM KOTOLUADAN KOPIO KUMAA OINSANAN NAKAHAMPIT ID KOPOTUNDAAN TOI KOPOIMAGANAN KOPOOPOSION TULUN KAMPUNG.
Montok tulun kampung ngai, kanou mingimot momoguno ginaras lotirik. Om momoguno ginaras lotirik miampai poingadang moi koinsodu mantad koligaganan. Tagal i do popooput ogumu kakamot lotirik id iso no palak (plag 3 pin) tuu koligogon moti ilo.
Di: Kombura
No comments:
Post a Comment