Christmas Children Party: Tudan Kiulu Tuaran

29 Momuhau, Kg Tudan Kiulu:- Nakapanau prugrim Children Party toi Karamaian Dountangaanak kahampit di kapanaandakan Tadau Natal toun 2012. Lobi 50 tangaanak kiumur 3 gisom 12 toun minamung do karamaian dilo. Pinaparati i ponorikohon mangayu i Katekis James Kulip (Paroki Toboh) do tudu prugrim dilo nopo nga manahak korotian Tadau Natal kumaa tangaanak. Kopokito nogi ilo do gompoton monimung om mamaramai tangaanak ngai id ponong id Sokid Kiulu. KKD Tudan, KKD Baraba, KKD Bambangan, KKD Romokon om KKD Poring nopo nga kaalaian ngai i nakahampit doid karamaian dilo.

Ogumu aktiviti nakapanau montok tangaanak kaampai no mongobus bilon, mongungkanit tontolu, momonsoi rombituon mantad bosikut, mongidu lukug longon om mogisuusuai po. Kiharo nogi pongitanan om parangahan koir mantad tangaanak wagu sumandak ngai. 

Agayo kopio rati do prugrim dilo. Okon nopo tangaanak o nakaanu kounalan om koimayaan nga iri tangaanak wagu om komolohingan po nga nokopokito piisaan om pogitaatabangan togirot. Mantad pitimbungakan mamalan prugrim gisom no potounda lintuhun kinoiyonon, mogonsok ngai om suusuai po karaja do okito kopio 'team work' do umat.

Id koponutuban, minoboros i Katekis James Kulip do kotilombus daa prugrim miagal dilo id toun tiiso om toun-toun rumikot. Alansan isio do nokoukab do ginawo om pomusarahan do tangaanak ilo loolobi kokomoi rati kopio toi komoon kopio do Tadau Natal. 

Minongunsikou nogi isio kumaa oinsanan umat nakahampit om nogi iri minonoluod ngai kakamot po toi kousinan.

Gambar-gambar:

Tadau Natal om Toun Wagu 2013.

Kopisanangan.

Kotobian Tadau Natal montok dii mamaramai.

Baino, tadau ko-31 wulan Momuhau. Nung di pogulu-gulu nga timpu no daa do momuhau montok tulun tokou mananom parai tidong. Mongugad tombolog om  momorungkasip tikus id koumaan. Nga okon ko iti komi do baino. Komi do baino nopo nga kokomoi diti toun 2012. Ogumu kopio naantakan tokou om sompomogunan id suang toun 2012. Mogisuusuai kopio nawayaan.

Pinointalang nogi do tongo saintis do haro koundoronok toi koligaganan koontok do pomogunan ontok mingka'ai toun 2012. Ogumu boros toi komi do id suang wulan Momuhau mituong o pomogunan solinaid tolu tadau. Kiharo nogi boros do opupusan iti pomogunan toi komoyon do kiamat id suang wulan Momuhau diti! Oroitan ngai kalendar tulun Maya i kohompit kopio om koontok kopio do pomusarahan toi ponoriukan tulun kokomoi kaantakan tagayo id suang wulan Momuhau.

Koundoronok om koundorosi kopio ngai komi diolo.

Nga mogisuusuai bogia komi tulun kokomoi ahal dilo. Haro tulun i koundali o pomusarahan om kowoyowoyoon dau tu oruhai no kiamat, kaa. Haro nogi ri loobi aparu sumambayang. Haro no ngai iri monimung tongo dian (candle) maan pongito ontok mituong pomogunan solinaid 3 totuong, kaa. Haro nogi iri tumahak nopo Kinorohingan.

Poingkuro po poingkuro nga nokopuriman om ki kopurimanan toko sondiri kahampit ngai dilo. Om monongkotoluod do Kinorohingan tuu aiso i kinaantakan mituong pomogunan miagal di nokomi. Montok doho sondiri nopo, oinsanan dii nga Kinorohingan no koilo. Aiso nokoilo timpu kiamat toi kopupuson do pomogunan. Kitab Injil nga karait nogi kokomoi diti.

Id kopupuson toun 2012, alansan do nagampot ngai iri niman-imanon di koimpuunon toun. Nung amu nagampot nga kiharo pomusarahan toi refleksi kokomoi kinawaya'waya'on id suang 2012. Mantad do refleksi dilo do kaanu mamalan do gompoton id toun wagu. Poingkuro do mamagampot toi poingkuro kawaya'waya'on id suang 2013 nga apalan nogi maya' om mantad refleksi kinawaya'waya'on di toun 2012.

Alansan do nunu iri toguangon id toun 2013 kapanau miampai osonong. Agampot no daa ngai iri iman-imanon toko.

Kotobian Toun Wagu 2013!
Agampot Nu I Iman-imanon Nu.

Pomilian, Dimokrasi om Ponsurungan

Pomilian, Dimokrasi om Ponsurungan

Pogulu ponoruon ku komi, osonong do poinonongon po komoyon do Pomilian, Dimokrasi om Ponsurungan i osurat id komi diti.

Pomilian
Pomilian nopo nga prosis mogihum om momili. Prosis diti kahampit pomilian nunu nopo i poimpasi toi amu poimpasi. Poimpasi nopo nga miagal momili isai tulun lansanon, momili tayam di olumis gompion di suang walai toi momili wotik bunga di kagayat ginawo. Oinsanan ki ginawo. Amu poimpasi nopo nga miagal momili korita kasanangan ginawo toi momili sinsu (chainsaw) maan pongolou suduon toi momili jinorito (generator) bobos poinsiriba gatang maan pongito id walai.

Kawaya toko nga prosis pomilian id koposion toko sangaangadau. Nga id komi diti, pomilian do komoyon toi oroitan ku nopo nga i pomilian lansanon tulun miagal luguan kampung, ponorikohon jkk kampung, ADUN om Parlimon.

Dimokrasi
Dimokrasi (democracy) nopo nga iso kopongoroitan i poinrani kopio dilo pomilian. Poomitanan nopo nga ontok momili toko do koruhang toi kouhangan (sawo), pinili toko iyau maya suang ginawo sondiri om okon ko sinuhu-suhu do suai tulun. Komoyon nopo sinuhu-suhu nga okon daa ko kouhangan iri tondu oti kusai nga mositi sowoon sabab sinuhu om koimayaan suai tulun. Iso poomitanan tagayo kopio nopo nga soira id pomilian lansanon tulun kampung, ADUN, Parlimon om suai-suai po. Komoyon do dimokrasi soira ontok momili om mamagarit pili (vote), ginarit o pili dii miampai poimponu ginawo om sabab nosorou do isio/isido no i pilion toko sondiri. Nga komoyon do amu dimokrasi toi okon dimokrasi iri ginarit toko pili dii sabab sinuhu-suhu om okon mantad ginawo dati sondiri.

Ponsurungan
Ponsurungan nopo nga iso maan soira mogihum toko kounalan. Poomitanan nopo nga di gulu-gulu nopo nga haro i komoyon monsurung mooi do kaanu iri tulun do dupot-dupot toi suang talun soira mooi pongintorus. Moi hombo toi moningkawa suang talun. Soira monsurung, i minonsurung no doti kaanu suang tlaun om suai huhumombo nopo nga amu. Haro po doti monsurung id timpu diti. Komoyon nogi do monuhu' iti monsurung. Om ponsurungan milo no komoyon do ponuhuan.

Pomilian, Dimokrasi om Ponsurungan
Nokuro tuu pinili' ku tulu komi diti?
Pomilian, dimokrasi om ponsurungan/ponuhuan nopo nga mogirani-rani om mogirait-rait. Soira oroitan pomilian, arait o dimokrasi. Om hiti nopo pogun toko Malaysia, soira oroitan pomilian, arait o ponsurungan.

Atamaan ku do posurat ingkaa sabab narait do Transparency International, ANI Washington, Hindustan Times om WSJ Live do pogun toko Malaysia nopo nga Luguan/Huguan do Ponsurungan! Transparency International, ANI Washington, Hindustan Times and WSJ Live, to name a few, have all bestowed Malaysia the dubious honour of Champion of Corruption (Chua Jui Ming, FMT). Poingkuro dokoyu pomusarahan? Nokoumbal kou nangku nokorongou haro manahak ponsurungan moi pilion sabaagi lansanon tulun kampung, ADUN po toi Parlimon?

Oputan...