Prapaska
Prapaska nopo nga kaantakan id Gereja i toponting kopio id suang do koposion tokou sabaagi umat Kristian Katolik. Iti no timpu kopoinwoguan tokou do tinan, pomusarahan om kotumbayaan. Iti nogi timpu tumounda' montok PASKA maya' kopokiompunan di dousa ngaawi tokou; tu PASKA nopo nga timpu Kinasansaraan, Kinapatayon om Kinotungagan di Tuhan Jesus Kristus montok koposion do pomogunan. Sabab diti no nokuro tu PASKA nopo nga kaantakan om karamaian do Gereja i bobos tagayo om toponting sabab maya PASKA Kristus nokoidu tokou mantad kapatayon nasabab di douso ngaawi.(oputan mambasa...)
Id timpu do prapaska angatan tokou do Gereja Katolik popoimagon kotumbayaan om piromutan kumaa Kinorohingan om kumaa toinsanan tulun. Milo iti wonsoyon maya kopooposion di opori sumambayang, mogkuasa om mamantang om nogi manahak kouhupan kumaa tulun tongosusa. Maya do sambayang kaanu tokou monginggirot do kotumbayaan om oiwoguan o koposion tokou. Maya mogkuasa kaanu popogirot do sambayang tokou. Maya kopogkuasaan kaanu tokou mongoling di doun tinan nopo mooi do lobi oining kumaa kasansaraan do tulun om kosusaan di tulun tongomosikin. Prapaska nopo nga timpu tokou retret solinaid 40 tadau miampai do Tuhan.
Karaaralano tokou sabaagi tulun Kristian Katolik do mogkuasa nopo nga misuai kopio di karaaralano tulun Islam do mogkuasa. Aiso i komoyon tokou do mongukab do puasa. Mimpuun tokou mogkuasa ontok tadau Kotolu Abu gisom tadau Ko-onom Tolidang (Holy Saturday). Montok nopo dati, mogkuasa okon nopo ko mogkuasa taakanon om tiinumon, nga mogkuasa mantad karaatan ngaawi toi au daa momidouso. Amu tokou suhuon do mogkuasa tadau-tadau. Obuli tokou manantu iso toi 2 tadau id suang sominggu do mogkuasa poimponu-i komoyon do dumuom tokooro toi tokuuri nopo. Nga osonong nogi nung kiwaa umat i tipogkuasa do tadau-tadau.
Id timpu do prapaska angatan tokou momolihung ngaawi ginawo om douso tokou maya mogkuasa mantad momonsoi do karaatan toi douso. Angatan tokou nogi popotood po di koubasanan aramai ti om kou'ukan ngaawi (berpesta pora dan kemabukan). Iti no sabab do amu tokou da papaharo karamaian miagal ramai pisasawa'an ontok timpu diti. Ingkaa nogi daa iri ramai pihabaian om karamaian di tangagayo kopio. Nung kiwaa kapanaandakan tadau kinosusuon po toi tadau kasarahan di nangapatai, nga pohoroon do sadang-sadang noopo daa. Ingkurian tokou maso ramai-ramai om nogi tiinumon di kaauk moi do koinsodu tokou ngaawi mantad momonsoi koindaratan om douso.
Mokianu tokou kouhupan om barakat mantad Spiritu Tobitua moi katanud tokou mogkuasa om momolihung douso tokou id timpu do prapaska diti. Kanou no toinsanan mogiampai manamba' (sumamba') Tuhan, popogirot kotumbayaan om kitonggungan sosiol loolobi id timpu binarakatan do Kinorohingan diti.
(Pinadalin mantad Surat Pastoral Paderi Paroki Toboh Untuk Musim Prapaska, March 9, 2011). Nung kiharo i amu koontok kopio komoyon hiti id nadalin kumaa boros Kadazandusun diti nga intangan tokou i surat pastoral nokomoi).
Kotoluadan.
No comments:
Post a Comment