Kiulu pododion watas
poomitanan kotundaan podtuongisan (daerah model pembangunan pelancongan)
Kiulu, 20.12.2013:- Nakapanau o
kopoimaganan Prugrim Kotundaan Biodivorsiti om Kopomogompian Ikosistom Pogun
Sabah (Projek Pembangunan Mapan Biosfera dan Pemuliharaan Ekosistem di Negeri
Sabah) hilo id Kg. Tudan, Kiulu Tuaran. Pinoimagon di Puru Koundangan Pogun YB
Datuk Joniston Bangkuai o prugrim dilo. Id booboroson dau nokomi disio do
prujik dilo nopo nga oponsol kopio montok kotundaan ikonomi tulun mogigion
loolobi id Kg. Tudan om watas Kiulu. Maya prujik dilo do oonuan om oruhangan o
koilalaan tulun ngai mogigion kokomoi kapantamangan do pogun posorili, naamot
do papanau karaja toi porobuatan diolo doid kampung. Minanahak isio do
poomitanan do kogompi daa o tulun mororobuat do koimbosian bawang om kogompian
tana’ posorili soira mongukab do pengumaan toi papanau pomutanaman diolo.
Tumanud disio, kitonggungan tagayo nogi o
porinta pogun do monokodung prujik diti miampai sokodung nogi mantad mogigion
kampung nakahampit. Alansan i Datuk Joniston i ponorikohon ponogi do Kotinanan
Podtuongisan Pogun Sabah (Sabah Tourism Board) do miampai sokodung ngai dilo do
agampot daa iri gimpoton prujik dilo. Nokolombus nogi disio do ki sogu isio
kumaa porinta pogun do papadadi watas Kiulu sabaagi iso watas poomitanan
kotundaan podtuongisan (model pembangunan pelancongan) id pogun diti. Kapanahak
do ogumu kounalan ilo kumaa watas om mogigion Kiulu.
Id booboroson dau, pinoilo nogi kawagu di
Datuk Joniston do i Gundohing Marius Samin pinosogu no do dumadi CDO Kiulu. I
Marius Samin nopo nga ponorikohon JKK Kg. Tudan om maamaso mandad do surat
papanau karaja sabaagi CDO Kiulu mantad koporintaan. Narait nogi di Datuk
Joniston do minggisiom isio om porinta do monuluk ngai sontob pokionuon
mogigion kampung. Toririmo disio sumontob do poposikap daa do kapanahan do
prujik ngai kotundaan kampung. Karait di talun-alun kumaa Kg. Baraba, alansan
isio do kapanau daa koponginsanangan talun alun dilo pogulu korikot toi aanu
iri poruntukan tagayo montok dilo. Kapamansayan talun-alun lumapus kumaa ponong
sokid Kiulu mantad ponong id Kg. Mantob nga nokosuang no nogi id palan
kotundaan pogun, ka disio.
Minamason nogi i Datuk Joniston do
potilombuson om kasasari daa rumomut dau o tulun ngai kampung okon nopo ko
poposogu nga montok nogi poporomut kopoilaan. “Osonong do potilombuson o
piromutan tiso om tiso (bilateral @ two way communication) tuu oilaan kopio iri
pointopot,” ka di Datuk Joniston. Pinopoilo nogi isio do mositi onuan sisimbar
poinsurat (rasmi) iri oinsanan ponguhatan toi sogu ngai tulun kampung. Tumanud
dau, iti nopo nga iso laang i mositi papanahon mooi amu kobontol do
koborulangan, suai ko monginsikap do pogirooromutan.
Nokorikot nogi UPKR Kiulu, lansanon ngai
mantad Upis Tuaran, JPS, Pomutanaman, Upis Talun om Taman-Taman Sabah suai ko lansanon
ngai om mogigion mantad kampung posorili.
Dii: Kombura Discovery
